Mat 139 Punkten huet Lëtzebuerg déi 10. Editioun vum Championnat vun der Degustatioun "à l'aveugle" zu Aÿ a Frankräich gewonnen. 31 Länner, Ekippen aus aller Welt hunn 12 Wäiner blann geschmaacht. D'Lëtzebuerger sinn an enger spannender Kompetitioun och réischt mam 10te Wäin a Féierung gaangen. De Coach Daniel Poos, d'Zaiah Amann, den Hervé Amann, de Guy Bosseler an de Jules Hoffelt sinn also Champion an der Successioun vun Ungarn, wat d'Editioun 2021 gewonnen hat.